(4)
لإن الصراحة في بلدنا قليلة
بفضل المباحث وأدب الرموز
جعلها اللئيم ابن بنت اللئيمة
شعار يومي تحته السموم كيف يعوز
ويهدل أصول الصراحة العظيمة
وقال ع السكوت ع الهزيمة يجوز
سجن القلعة: 1973
* * *
مـــوسم الحــرائق 15
رئيس مجلس إدارة شركة نصر لسرقة مصر
يتوجه وبعون الله وبنفس التكنيك إياه
يدخل على المصنع هواه ويمارس ملعوب العصر
اسرق واحرق
سريقة سريقة سريقة.. سرقوا المصنع
حريقة حريقة حريقة.. حرقوا المخزن
سريقة حريقة حريقة سريقة.. حريقة سريقة سريقة حريقة
سرقوا القوت والنور والقدرة
حرقوا الأرض البور والخضرة
مين يا ولاد في الدنيا يصدق إن الراجل يحرق بيته
خايف قال م البيت النايم يصحى ويكشف سرقة زيته
اللي سرقها واللي حرقها بكرة صاحبها ح يخرب بيته
القاهرة: 1973
* * *
موال الفول والطعمية 16
عن موضوع الفول واللحمة صرح مصدر قال مسئول
إن الطب اتقدم جداً والدكتور محسن بيقول
إن الشعب المصري خصوصاً من مصلحته يقرقش فول
حيث الفول المصري عموماً يجعل من بني آدم غول
تاكل فخده في ربع زكيبة والدكتور محسن مسئول
يديك طاقة وقوة عجيبة تسمن جداً تبقى مهول
ثم أضاف الدكتور محسن إن اللحمة دي اسم أكيد
بتزود أوجاع المعدة وتعود على طولة الإيد
وتنيم بني آدم وتفرقع منه المواعيد
واللي بياكلوا اللحمة عموماً حيخشوا جهنم تأبيد
يا دكتور محسن يا مزقلط يا مصدر يا غير مسئول
حيث ان انتوا عقول العالم والعالم محتاج لعقول
ما رأي جنابك وجنابهم فيه واحد مجنون بيقول
احنا سيبونا نموت باللحمة وانتو تعيشوا وتاكلوا الفول
ما رأيك يا كابتن محسن مش بالذمة كلام معقول
القاهرة: 1974
* * *
نيـكســــــــــــون 17
شرفت يا نيكسون بابا يا بتاع الووترجت
عملولك قيمة وسيما سلاطين الفول والزيت
فرشولك أوسع سكة من راس التين على مكة
وهناك تنفذ على عكا ويقولوا عليك حجيت
"وأهو مولد ساير داير شيلاه يا صحاب البيت"
جواسيسك يوم تشريفك عملولك دقة وزار
تتقصع فيه العايقة والساكت والمنشار
والشيخ شمهورش راكب ع الشعب وهات يا مواكب
وبواقي الزفة عناكب ساحبين من تحت الحيط
"وأهو مولد ساير داير شيلاه يا صحاب البيت"
خد مني كلام يبقى لك ولو أنك مش ح تعيش
لا ح أقول أهلاً ولا سهلاً ولا تيجي ولا ما تجيش
بيقولوا اللحم المصري مطرح ما بيسري بيهري
وده من تأثير الكشري والفول والسوسي أبو زيت
"وأهو مولد ساير داير شيلاه يا صحاب البيت"
القاهرة: 1974
* * *
ديســـــتــــــــان 18
فاليري جيسكار ديستان والست بتاعته كمان
حيجيب الديب من ديله ويشبع كل جعان
يا سلاملم يا جدعان ع الناس الجنتلمان
داحنا حنتمنجه واصل وحتبقى العيشة جنان
التليفزيون حيلون والجمعيات تتكون
والعربيات حتمول بدل البنزين بارفان
وحتحصل نهضة عظيمة وحتبقى علينا القيمة
في المرسح أو في السيما أو في جنينة الحيوان
وحتبقى الأشيا زلابية ولا حوجة لسوريا وليبيا
وحنعمل وحدة أرابيا مع لندن والفاتيكان
والفقرا حياكلوا بطاطا وحيمشوا بكل آلاطة
وبدال ما يسموا شلاطة حيسموا عيالهم جان
ودا كله بفضل صديكي ديستان الرومانتيكي
ولا حدش فيكو شريكي في المسكن والسكان
القاهرة: 1975
بيــــــــان هــــام 19
"هنا شقلبان محطة إذاعة حلاوة زمان"
من القاهرة ومن كردفان وسائر بلاد العرب واليابان
تقدم إليكم بكل اللغات مراسح وسيما وجميع الفنون
صحافة ومنابر وتليفزيونات وخطبا في جوامع وجبنة وزتون
ونقزح ونركب جميع الموجات ونبحث ونفهم في كل الشئون ودايماً نلعلع في كل الحالات ولا حد سامع ولا يحزنون
وتسمع ما تسمع ودا ما يهمناش لإن احنا أصلاً بناكل بلاش
فخليك في نفسك وما تخليناش نسلط عليك القلم واللسان
"هنا شقلبان محطة إذاعة حلاوة زمان"
يسر الإذاعة وما يسركوش بهذه المناسبة وما بندعيكوش
نقدم إليكم ولا تقرفوش شحاتة المعسل بدون الرتوش
شبندر سماسرة بلاد العمار
معمر جراسن للعب القمار
وخارب مزارع وتاجر خضار
عقبال أملتك أمير الجيوش ما تقدرش تنكر تقول مااعرفوش
شحاتة المعسل حبيب القلوب يزيل البقع والهموم والكروب
يأنفس يأفين يبلبع حبوب ويفضل يهلفط ولا تفهموش
وتفهم ما تفهم دا ما يهمناش لإن إنت فاهم وعامل طناش
"هنا شقلبان محطة إذاعة حلاوة زمان"
لأن المخبي ظهر واستبان وكل المسائل بدت للعيان
وطلعت حكاوي ونزلت كمان عن التهريبة وعن كيت وكان
وعن ألعبان ظهر في المدينة
كأنه الطوفان وغرق مراكب وسوح غيطان
وبعض المراكب ح تغرق كمان وأزمة مساكن وأزمة أمان
وعالم بياكل في عالم جعان وريحة مؤامرة في جو المكان
لهذا وذاكا تكلم كمان نقدم إليكم عروسة وحصان
"هنا شقلبان محطة إذاعة حلاوة زمان"
بسم الله سلام عليكم وسلمون وموز
وأما المسائل فهنجف ولوز
فيا إخوتي ويا أخوات إليكم بياني كما هو آت
جميع المسائل تمام التمام وكل الكلام دا مجرد كلام
فصبراً جميلاً ولا تقلقوش وشغل الضغاين أنا ما أقبلوش
مافيش أي حاجة وقدر كمان إن فيه أي حاجة
مافيش أي حاجة مالوش أي لازمة الكلام واللجاجة
وعيب أن عيل يسوق السماجة ويعمل لي باللو ويعمل ديباجة
أنا بطبعي ضد السماسرة الكبار
بحكم المنافسة وحكم الجوار
لكن مش ف طبعي إني أعمل فضيحة
لواحد زميلي هبش كام صفيحة
ماكل الزمايل بتهبش صفايح
وكل اللي جاي ماش زي اللي رايح
فيا أيها الشعب صهين تفلعص مساء التنفيس مساء الروايح
أخويا الأمير بزرميط الإيراني
بعت لي السنة دي عزمني ودعاني
أنا قبلت طبعاً ورحنا العزومة وكانت وليمة ما تحصلش تاني
دا إيه المحمر وإيه المكمر إيه المشمر إيه الصواني
أنا دماغي تعبت ولفت صراحة
من الفخفخة والهنا الأصفهاني
هناك يعني مثلاً إذا شربت طافية
تمز بكوارع وبسطرمة ضاني
ما شفتش هناك ناس بتحقد عليهم
ولا ناس بتشتم فلان الفلاني
لأنه اشترى عزبتين من شطارته وحكمة إدارته وطلع مباني
وبعد الوليمة استلمنا الهدايا
مفضض ومدهب وقز وقيشاني
وطبعاً أخويا الأمير قال لي حاجة
ح أقولها لكو طبعاً إذا الوقت ناسب
ح يطلع لي عيل بدون أي حاجة
ويعمل لي فلحس ويقعد يحاسب
دا حقد اشتراكي أنا ما اقبلوش
ولو هو ابني أنا ما اعتقوشي
فيا أيها الشعب كمل جميلك وصبراً والزم حتيجي المصاري
وتاكل وتشرب ما يأتيلك وتغرق في بحر العبيد والجواري
وترسم حياتك حسب ما يرائيلك
وتملا الحواري فساقي وقصاري
تسبح بحمدك وتشكر جميلك وفضل الزبالة وطفح المجاري
ختاماً سلاماً وآخر كلاماً ضروراً يسود الهدوء والوئام
فماذا وإلا ح اطربقها واللا واهرب فلوسي واسافر قواماً
سلام عليكم وسلمون وموز
بصفتي رئيساً وأباً وجوز
القاهرة: 1976
بـــوتيــــكـــــات 20
بوتيكات النات كوا النات وشقق مفروشة وعمولات
يا حلاوة الناوه كوا الناوه يا بلدنا يا آخر فتاكات
شبيك لبيك فتح مخك لبيك شبيك غمض عينيك
حتقفل مخك ح نطخك ونلوشك لو تفتح عينيك
اسكت طنش تركب مازدا وتعيش سلطان في البروازدا
مش عاجبك فالجبنة الفازدة والعيش والفول والكرات
"بوتيكات النات كوا النات"
مين فيكو ما يعرفش عليوه شيال المنيا الكحيان
في ثواتي اتموّل واتحوّل بقى مسيو عليوه عليان
إزاي ماهى بوظة ومفتوحة على حس الناس المدبوحة
وأرانب صاحية ومدبوحة تتأستك تبع البنوكات
"بوتيكات النات كوا النات"
حتقولي الفقرا ومشاكلهم دي مسائل عايزة التفانين
وأنا رأيي نحلها رباني ونموت كل الجعانين
وبهذا ما حدش ح يجوع لو نغلق هذا المشروع
وحنقفل هذا الموضوع نهائياً ونعيش في ثبات
"بوتيكات النات كوا النات"
سجن الاستئناف: 1981
* * *